ⴰⴼ ⵓⵍⵎⵎⴰⵙ

ⵙⵓⴳⴳⵣ

ⴰⴷⵍⵉⵍ ⵏ ⵓⵙⵎⵓⵜⵜⴳ ⵉ ⵜⵡⵓⵔⵉ ⴳ ⵡⴰⵎⵎⴰⵙ ⴰⵍⵉⴱⵉ ⵏ ⵜⵖⵓⵔⵉⵡⵉⵏ ⵜⵉⵎⴰⵣⵉⵖⵉⵏ

ⵉⵙⵡⵉ ⵏ ⵓⴷⵍⵉⵍ-ⴰ ⵏ ⵓⵙⵎⵓⵜⵜⴳ ⵉⴳⴰ ⵜ ⵓⵙⵎⵏⵉⴷ ⵏ ⵓⵙⴰⵜⵉ ⴰⵎⵡⵓⵔⴰⵏ ⴷ ⵓⵎⵙⵉⵙⵉ ⵉⵎⵏⴹⵎ ⵉ ⵜⵡⵓⵔⵉ ⴳ ⵡⴰⵎⵎⴰⵙ ⴰⵍⵉⴱⵉ ⵏ ⵜⵖⵓⵔⵉⵡⵉⵏ ⵜⵉⵎⴰⵣⵉⵖⵉⵏ, ⴰⵢⵍⵍⵉ ⵉⵜⵜⴰⴳⴳⴰⵏ ⵜⵉⴼⴰⵡⵜ ⵏ ⵜⵉⵍⴰⵍⵉⵏ, ⴷ ⵓⵎⵙⴰⵙⴰ ⵏ ⵜⵥⵍⴰⵢⵉⵏ, ⴷ ⵓⵙⵉⴷⴽⵍ ⵏ ⵜⵎⵓⵙⵏⴰⵀⴰⵊⵉⵏ ⵏ ⵜⵡⵓⵔⵉ ⴳⴰⵔ ⵉⴳⵣⵎⴰⵏ ⵉⵎⴳⴰⵔⵔⴰⴷⵏ. ⵉⴳⴰ ⵓⴷⵍⵉⵍ-ⴰ ⵢⴰⵏ ⵓⵎⴰⵙⵙ ⴰⴷⵙⵍⴰⵏ ⵉ ⵓⵎⴰⵢⴰ ⵏ ⵉⵎⵙⵡⵓⵔⵉⵢⵏ ⴷ ⵉⵎⴷⵔⴰⵡⵏ, ⴷ ⵓⵙⵉⵜⴳ-ⵏⵙⵏ ⴰⴼⴰⴷ ⴰⴷ ⴳⵣⵓⵏ ⵜⴰⴱⵔⴰⵜ ⵏ ⵡⴰⵎⵎⴰⵙ ⴷ ⵉⵙⵡⵉⵢⵏ-ⵏⵙ ⵉⵎⴰⵙⵙⴰⵏⵏ ⴷ ⵉⴷⵍⵙⴰⵏⵏ, ⴷ ⵓⵍⵜⴰⵖ ⴰⵎⵢⴰⴳⴰⵏ ⴳ ⵓⵙⵏⵙⵉ ⵏ ⵉⵖⴰⵡⴰⵙⵏ ⴷ ⵉⵙⵏⴼⴰⵔⵏ-ⵏⵙ.

ⴰⵔ ⵉⵎⵎⴰⵍ ⵓⴷⵍⵉⵍ ⵜⴰⵖⵙⵙⴰ ⵜⴰⵏⵎⵀⴰⵍⴰⵢⵜ ⵏ ⵡⴰⵎⵎⴰⵙ ⴷ ⵉⴳⵣⵎⴰⵏ-ⵏⵙ ⵉⵎⵥⵍⴰⵢⵏ, ⵉⵙⴱⴰⵢⵏ ⵜⵉⵎⵀⴰⵍ ⵏ ⴽⵓ ⴰⴳⵣⵓⵎ ⴷ ⵉⴳⵔⴰⵏ ⵏ ⵜⵡⵓⵔⵉ-ⵏⵙ, ⵙ ⵓⵙⵉⴷⴷ ⵅⴼ ⵡⴰⵜⵉⴳ ⵏ ⵓⵙⵎⵙⴰⵙⴰ ⴷ ⵓⵎⴽⴰⵎⴰⵍ ⴳⴰⵔ ⵜⵙⴳⵉⵡⵉⵏ ⵜⵉⵙⵏⵉⵍⵙⴰⵏⵉⵏ, ⴷ ⵜⴱⵉⴷⴰⴳⵓⵊⵉⵢⵉⵏ, ⴷ ⵜⵙⴽⵍⴰⵏⵉⵏ, ⴷ ⵜⵎⵣⵔⴰⵢⵉⵏ, ⴷ ⵜⴷⵍⵙⴰⵏⵉⵏ. ⴰⵙⵓⴷⵙ-ⴰ ⴰⵔ ⴷ-ⵉⵎⵎⴰⵍ ⵜⴰⵎⵓⵖⵍⵉ ⵏ ⵡⴰⵎⵎⴰⵙ ⴳ ⵓⵎⵢⴰⴳⴳⴰⵔ ⴰⴽⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴰⵎ ⵢⴰⵏ ⵓⵏⴰⴳⵔⴰⵡ ⵉⵎⴷⴰⵏ ⵉⵙⵎⵓⵏⵏ ⴳⴰⵔ ⵓⵏⴰⴷⵉ ⴰⵎⴰⵙⵙⴰⵏ, ⴷ ⵓⵙⵍⵎⴷ, ⴷ ⵓⵙⵜⵜⴻⴳ ⴰⴷⵍⵙⴰⵏ.

ⴰⵎⴽ ⵉⵙⵉⵙⴼⵉⵡ ⵓⴷⵍⵉⵍ ⵉⴱⴰⵔⵉⵣⵏ ⵉⵜⵜⵓⵙⵖⵣⴰⵏⵏ ⵉ ⵓⵙⵎⴷ ⵏ ⵜⵡⵓⵔⵉⵡⵉⵏ ⵜⵉⵎⴰⵙⵙⴰⵏⵉⵏ ⴷ ⵜⵙⴽⵍⴰⵏⵉⵏ, ⵙⴳ ⵓⵙⵎⵏⵉⴷ ⵏ ⵉⵙⵓⵎⴰⵔ ⴷ ⵉⵙⵏⴼⴰⵔⵏ, ⵉⵣⵔⵉ ⵙⴳ ⵜⴼⵍⵓⵔⵉⵏ ⵏ ⵓⵙⵜⴰⵢ ⴷ ⵓⵙⵖⵜⵉ, ⴰⵔ ⴰⵥⵔⴰⴳ ⴷ ⵜⵉⴳⵔⵉ. ⴰⵔ ⵉⵙⵔⵓⵙ ⵅⴼ ⵓⵡⵇⵇⵔ ⵏ ⵉⵙⵉⴳⴰⵍ ⵉⴽⴰⴷⵉⵎⵉⵢⵏ ⴷ ⵉⴷⴱⵍⴰⵏⵏ, ⴰⴼⴰⴷ ⴰⴷ ⵉⴹⵎⵏ ⵜⴰⵖⴰⵔⴰ ⵏ ⵓⴼⴰⵔⵙ, ⴷ ⵓⴼⵔⴰⴳ ⵏ ⵉⵣⵔⴼⴰⵏ, ⴷ ⵓⵙⵉⴷⵓⵎ ⴰⵎⵔⵙⴰⵍ.

ⴰⵔ ⵉⵜⵜⴰⵙ ⵓⴷⵍⵉⵍ ⵜⵉⵎⵙⴰⵍⵉⵏ ⵜⵉⴷⴱⵍⴰⵏⵉⵏ ⴷ ⵜⵏⵎⵀⴰⵍⴰⵢⵉⵏ ⵉⵍⴰⵏ ⵜⴰⵡⵓⵔⵉ ⴳ ⵡⴰⵎⵎⴰⵙ, ⴳⵉⵙⵏⵜ ⵜⵉⵎⵓⵙⵏⴰⵀⴰⵊⵉⵏ ⵏ ⵡⴰⵏⵏⵉⵍ, ⴷ ⵜⵉⵣⵡⵓⵔⴰ ⴳ ⵓⵙⴱⵖⵙ ⵏ ⵓⴼⴰⵔⵙ, ⴷ ⵉⵎⵢⴰⴷⵏ ⵏ ⵓⵙⵎⵙⴰⵙⴰ ⴰⴽⴷ ⵜⵎⵀⵍⴰ. ⵎⴰⵏⴰⵢⴰ ⵉⵜⵜⴰⵡⵙ ⴳ ⵓⵙⵏⵓⵍⴼⵓ ⵏ ⵜⵡⵡⵏⴰⴹⵜ ⵏ ⵜⵡⵓⵔⵉ ⵉⴱⴰⵢⵏⵏ, ⵉⴱⴷⴷⵏ ⵅⴼ ⵜⴼⵔⴰⵡⵜ, ⴷ ⵜⵎⴰⵙⴰⵢⵜ, ⴷ ⵓⵙⵡⵓⴷⴷⵓ ⵉⵖⵓⴷⴰⵏ ⵉ ⵉⵎⴰⵙⵙⵏ ⵍⵍⴰⵏⵉⵏ.

ⴳ ⵓⵎⴰⵜⴰ-ⵏⵙ, ⵉⵙⴷⴷⵉⴷ ⵓⴷⵍⵉⵍ ⵅⴼ ⵓⵙⴽⵜ ⵏ ⵓⵙⵎⵓⵜⵜⴳ ⴷ ⵜⵏⴼⵍⵉⵜ, ⵙ ⵡⴰⵏⵏⵉⵍ ⵏ ⵜⵣⵎⵎⴰⵔ, ⴷ ⵓⵙⴱⵖⵙ ⵏ ⵜⵉⵏⵉⵣⵉⵢⵉⵏ, ⴷ ⵜⵙⴽⴰ ⵏ ⵜⵉⵥⴹⵕⴰ ⵜⵉⵏⴰⴷⴰⵢⵉⵏ ⴷ ⵜⵉⵙⵏⵓⵍⴼⴰⵏⵉⵏ ⵏ ⵉⵎⵙⵡⵓⵔⵉⵢⵏ. ⵜⴰⵡⵔⵉⵇⵜ-ⴰ ⵜⴰⵏⵙⵏⴰⵙⴰⵢⵜ ⵜⴳⴰ ⴰⵏⴽⵛⵓⵎ ⴰⵎⵡⵓⵔⴰⵏ ⵉ ⵓⴳⵣⴰ ⵏ ⵜⵓⵎⴰⵢⵜ ⵏ ⵓⴷⵍⵉⵍ, ⴷ ⵓⵎⴰⵏⴰⵔ ⴰⴳⵣⵣⴰⵍ ⵉⵙⵡⴰⵍⴰⵏ ⵜⴰⵡⵓⵔⵉ ⵏ ⵢⴰⵍ ⴰⵙⵙ ⴳ ⵡⴰⵎⵎⴰⵙ, ⵉⵙⴷⵓⵙ ⵜⵉⵍⴰⵍⵜ-ⵏⵙ ⵜⴰⵏⴰⵎⵓⵔⵜ ⴳ ⵓⵢⴰⴼⵓ ⵏ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⴰⵎⴰⵣⵉⵖⵜ.